Dagana 9 til 13. júlí verður haldinn sérstaklega spennandi ævintýraflokkur í Kaldárseli fyrir drengi og stúlkur á aldrinum 10-13 ára. Ævintýraflokkurinn er sérsniðinn til að höfða til barna á þessum aldri.
Til viðbótar við hefðbundið sumarbúðarstarf er m.a. boðið upp á fjársjóðsleit, varðeld, grillaða sykurpúða, létta næturgöngu, fjörugan vatnsslag, þrautabraut, diskótek og jafnvel gist eina nótt í helli eða úti undir berum himni (valfrjálst).
Ævintýraflokkurinn í fyrra tókst með eindæmum vel og í ár er stefnt á að gera enn betur. Í flokknum verður mikið til sama starfsfólk og verið hefur undanfarin ár og teljum við það mikinn styrk fyrir staðinn þar sem að í hverri stöðu er vel valinn einstaklingur.
Í ævintýraflokknum er sérstök áhersla á óvæntar uppákomur sem glæða þennan einstaka flokk miklu lífi, skilja eftir ógleymanlegar stundir og frábærar minningar sem enginn má láta framhjá sér fara.
